لە رۆژی جیهانی ئایدزدا،لە هەرێمی کوردستان دووحاڵەتی نوێی ئایدز تۆمار کراوە

لە رۆژی جیهانی ئایدزدا،لە هەرێمی کوردستان دووحاڵەتی نوێی ئایدز تۆمار کراوە

ئەمڕۆ ڕۆژی جیهانی بەرەنگار بوونەوەی نەخۆشی ئایدزە ، کە خەڵکی بەهۆی ڤایرۆسی HIV تووشی دەبن بە پێی ڕاپۆرتێکی وەزارەتی تەندروستی لە هەرێمی كوردستان دوو حاڵەتی نوێی ئایدز تۆمار كراوە.

 وەزارەتی تەندروستی حکومەتی  هەرێمی کوردستان لە ڕاگەیەندراوێکدا ڕایگەیاند ، ئەمڕۆ یەكشەمە یەكی كانوونی یەكەم ، ڕۆژی بەرەنگاربوونەوەی نەخۆشی ئایدزە ، دەرفەتێكی جیهانییە بۆ هۆشیاركردنەوەی خەڵك و یەكخستنی هەوڵەكانی دەزگا پێوەندارەكان و خستنەڕووی هاوكاری و پاڵپشتی بۆ تووشبووانی نەخۆشیی ئایدز لەسەر ئاستی دنیا.

باس لەوەش كراوە، لە دنیادا 37 ملیۆن  و 900 هەزار هەڵگری ڤایرۆسی كەمی بەرگری لەش HIV هەیە و ساڵانە نزیكە یەك ملیۆن كەس دەكوژێت لە دنیا و نزیكەی دوو ملیۆنی تریش وەك تووشبووی نوێ دەكاتە قوربانی ، هەرچەندە تا ئێستە ئایدز ، چارەسەری بنبڕكەری نییە ، بەڵام دەرمانی دژە ئایدزی زۆر كاریگەر هەن كە دەتوانن بە تەواوی كۆنتڕۆڵی نەخۆشییەكە بكەن و دەرفەت بە تووشبوو بدەن كە ژیانێكی ئاسایی وەك هەر كەسێكی تر بژیت.

ڕوون كراوەتەوە، لە هەرێمی كوردستان ئەمساڵ دوو حاڵەتی نوێی نەخۆشییەكە لەناو هاووڵاتییانی هەرێم تۆمار كراوە، بەمەش كۆی گشتی تووشبووانی ئایدز لە هەرێم  لە ساڵی ۱۹٨٦ تا كۆتایی ۲۰۱٨ دەبێتە 35 حاڵەت كە نۆیان لە ڕەگەزی مێینەن و 26 نێرینەن.

ئەوەش ئاشكرا كراوە، ساڵانە زیاتر لە 350 هەزار پشكنینی ڤایرۆسی ئایدز لە هەرێم ئەنجام دەدرێت، هەموو بیانییەكان كە دێنە هەرێم پشكنینیان بۆ دەكرێت ، هەروەها هەموو بوتڵێكی خوێن دەپشكنرێت و ئەوانەی تازە ژیانی هاوسەری پێكدێنن ، كرێكاری شوێنە گەشتیارییەكان ، بەندكراوەكان ، نەخۆشانی گورچیلەی درێژخایەن و نەخۆشی سیل و هەوكردنی جگەر و ئەوانەی نەشتەرگەرییان بۆ ئەنجام دەدرێت.

وەزارەتی تەندروستی باسی لەوەش كردووە، ئەمساڵ لە ئەنجامی پشكنینی بیانییەكان 41 حاڵەتی نەخۆشییەكە دۆزراوەتەوە و ڕەوانەی وڵاتانی خۆیان كراونەتەوە .